Fáilte curtha roimh bhorradh mór faoin fheirmeoireacht

12 January, 2009

Chuir FPE Shinn Féin Bairbre de Brún fáilte roimh an deimhniú ón Aire Talmhaíochta Michelle Gildernew go mbeidh an Scéim Nuachóirithe Feirme £15.2 milliún oscailte d’fheirmeoirí ón 28 Eanáir. 
Dúirt an Iníon de Brún:
“Tugann an scéim seo faill d’fheirmeoirí infheistiú a dhéanamh ina ngnó féin.  Cuideoidh sin le feirmeoirí bheith níos iomaíche
“Tá próiseas iarratais ann atá díreach agus simplithe agus ba chóir d’fheirmeoirí dul i dteagmháil le ceann de na 8 n-oifig RTFR (DARD) a bheidh ag riar na scéime agus ag éisiú iarratas le gur féidir leo a fheiceáil cad é is féidir leo a dhéanamh le teacht ar an scéim £15 milliún.
 “Cuirim fáilte fosta roimh an athbhreithniú atá déanta ag an Aire, Michelle Gildernew, ar raon innealra agus ar tháirgí eile a cháileoidh do dheontais le gur féidir le gach earnáil sa tionscal tairbhe a bhaint as.

“Is mór a rachaidh sin chun tairbhe an fheirmeora aonair atá ag iarraidh infheistiú a dhéanamh chun an t-innealra feirme a uasghrádú agus meallfaidh sé na milliúin isteach inár gceantair tuaithe agus beidh borradh faoi ghnó do sholáthróirí áitiúla mar gheall air.” CRÍOCH